កាលពីរសៀល ថ្ងៃទី០២ ខែមករា ឆ្នាំ២០២៣ លោកស្រី សម ផល្លា ប្រធានមន្ទីរព័ត៌មាន បានដឹកនាំកិច្ចប្រជុំបូកសរុបលទ្ធផលការងារប្រចាំឆ្នាំ២០២២ និងទិសដៅភារកិច្ចអនុវត្តបន្តឆ្នាំ២០២៣ របស់មន្ទីរព័ត៌មាន ។ កិច្ចប្រជុំនេះមានការអញ្ជើញចូលរួម ពីលោកអនុប្រធានមន្ទីរ លោក លោកស្រី ប្រធាន អនុប្រធានការិល័យទាំង៥ ចំណុះឲ្យមន្ទីរព័ត៌មាន ជាច្រើននាក់ ផងដែរ ។
បន្ទាប់ពី ការទស្សនា ការពិភាក្សា និងការចូលរួមមតិកែសម្រួល លើក្លីបវីដេអូរស្តីពីសមិទ្ធផល ៥ឆ្នាំ របស់រដ្ឋបាលខេត្តកំពង់ចាម និងការរាយការណ៍ អំពីរបាយការណ៍បូកសរុបលទ្ធផលការងារប្រចាំឆ្នាំ២០២២ និងទិសដៅអនុវត្តភារកិច្ចអនុវត្តបន្តឆ្នាំ២០២៣ របស់ការិយាល័យទាំង ៥ ចំណុះឲ្យមន្ទីរព័ត៌មាន រួចមក លោកស្រី សម ផល្លា ប្រធានមន្ទីរព័ត៌មាន បានថ្លែងនូវការកោតសរសើរ និងវាយតម្លៃខ្ពស់ ចំពោះ ថ្នាក់ដឹកនាំ មន្ត្រីក្រោមឱវាទ នៃការិយាល័យទាំង៥ ដែលបានខិតខំប្រឹងប្រែង យកចិត្តទុកដាក់បំពេញភារកិច្ច និងការរួបរួមសាមគ្គី អនុវត្តនូវតួនាទីរបស់ខ្លួន ប្រកបដោយស្មារតីទទួលខុសត្រូវ និងទទួលបានលទ្ធផលផ្លែផ្កា ជាបន្តបន្ទាប់ ។ ជាក់ស្តែង ការយកចិត្តទុកដាក់ ក្នុងការផ្សព្វផ្សាយនូវព័ត៌មានតាមរយៈប្រព័ន្ធនានា រួមមាន ÷ ទូរទស្សន៍ វិទ្យុ និងផេក មួយចំនួនទៀត របស់ការិយាល័យនីមួយៗ បានលឿន រហ័ស និងទាន់ពេលវេលា ដើម្បី បានជ្រួតជ្រាប ទៅដល់សាធារណជន នៅក្នុងមជ្ឈដ្ឋាន ។
ឆ្លៀតក្នុងឱកាសនោះដែរ លោកស្រីប្រធានមន្ទីរ ក៏ជម្រុញអោយថ្នាក់ដឹកនាំការិយាល័យនីមួយៗ ពង្រឹងនូវសមត្ថភាពមន្ត្រីរបស់ខ្លួន តាមរយៈ ការចែករំលែកបទពិសោធន៍ និងការផ្ទេរនូវចំណេះដឹងផ្សេងៗ ដើម្បី បង្កើននូវធនធានមនុស្ស ឲ្យបានកាន់តែច្រើន ជម្រុញធ្វើអោយការិយាល័យនីមួយៗ និងអង្គភាព កាន់តែមានការអភិវឌ្ឍរីកចំរើនទៅមុខ ថែមទៀត ។ ក្រៅពីនោះ ការិយាល័យជំនាញ ទូរទស្សន៍ និងវិទ្យុ ត្រូវបង្កើនការផលិតវីដេអូរព័ត៌មាន បទយកការណ៍ និងបទសម្ភាសន៍ ដើម្បី ផ្សព្វផ្សាយទីក្នុងប្រព័ន្ធរបស់ខ្លួន ឲ្យបានច្រើន បន្ថែមទៀត ៕
