អត្ថបទ៖ ចិន សារ៉ាត
ដើម្បី រួមចំណែកវិភាគទាន ទៅតាមគោកលការណ៍ស្ម័គ្រចិត្ត សម្រាប់យកមកទ្រទ្រង់ដល់វិស័យមនុស្សធម៌ នៅក្នុងខេត្តកំពង់ចាម បច្ចុប្បន្ននេះ គេសង្កេតឃើញថា សប្បុរសជនគ្រប់ទិស បាននាំអំណោយជាថវិកា មកផ្ដល់ជូនស្នាក់ការសាខាកាកបាទក្រហមកម្ពុជា ខេត្តកំពង់ចាម ជាបន្តបន្ទាប់ ។ ជាក់ស្ដែង នៅព្រឹកថ្ងៃពុធ ទី១៣ ខែឧសភា ឆ្នាំ២០២០ នេះ ឯកឧត្តម អ៊ុន ចាន់ដា អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តកំពង់ចាម ក្នុងឱកាស ដឹកនាំកិច្ចជុំគណៈកម្មាធិការសាខាកាកបាទក្រហមខេត្ត ដើម្បី ត្រួតពិនិត្យការងារទទួលវិភាគទានពីសប្បុរសជន ជួយទ្រទ្រង់ដល់សាខាកាកបាទក្រហមកម្ពុជា ខេត្តកំពង់ចាម ។
ឆ្លៀតក្នុងឱកាសនោះដែរ ឯកឧត្ដម ប្រធានគណៈកម្មាធិការសាខាកាកបាទក្រហមកម្ពុជា ខេត្តកំពង់ចាម ក៏បានអញ្ជើញទទួលនូវថវិកាពីសប្បុរសជន ដែលបាននាំថវិកា នៅស្នាក់ការសាខា ផងដែរ ។ ឯកឧត្ដម អ៊ុន ចាន់ដា មានប្រសាសន៍ថា ក្នុងនាមឯកឧត្តម ហ៊ុន ណេង សមាជិកអចិន្ត្រៃយ៍ នៃរដ្ឋសភា អ្នកតំណាងរាស្ត្រមណ្ឌលកំពង់ចាម និងជាប្រធានកិត្តិយសសាខាកាកបាទក្រហមកម្ពុជា ខេត្តកំពង់ចាម និងក្នុងនាមប្រធានគណៈកម្មាធិការសាខា ឯកឧត្តម បានថ្លែងអំណរគុណ ទៅដល់ ឯកឧត្តម លោកជំទាវ លោកឧកញ៉ា លោក លោកស្រី អ្នកនាង កញ្ញា ជាក្រុមការងារចុះជួយខេត្ត សមាជិកព្រឹទ្ធសភា រដ្ឋសភា មន្ត្រីរាជការ និងវិស័យឯកជន ក្នុងខេត្តទាំងអស់ ដែលបានចូលរួមបរិច្ចាគវិភាគទានជួយទ្រទ្រង់ដល់សាខាកាកបាទក្រហមកម្ពុជា ខេត្តកំពង់ចាម ។ ជាមួយនោះ ក៏បានអំពាវនាវ ដល់សប្បុរសជនជាតិ និងអន្តរជាតិ សូមចូលរួមចំណែកជាថវិកា និងសម្ភារៈ បន្តទៅទៀត ដើម្បី ទ្រទ្រង់ដល់វិស័យមនុស្សធម៌ នៅក្នុងខេត្តកំពង់ចាម ។
សូមរំលឹកថា ឆ្នាំនេះ ផ្អែកតាមស្ថានភាពដែលពិភពលោក ក៏ដូចជាព្រះរាជាណាចក្រកម្ពុជា កំពុងខិតខំប្រឹងប្រែងក្នុងយុទ្ធនាការប្រយុទ្ធប្រឆាំងនឹងជម្ងឺកូវីដ ១៩ កាកបាទក្រហមកម្ពុជា បានណែនាំដល់សាខាកាកបាទក្រហមទាំង ២៥រាជធានី ខេត្ត ដែលត្រូវគៀងគរមូលនិធិក្នុងឱកាសអបអរសាទរខួបលើកទី១៥៧ ទិវាពិភពលោក កាកបាទក្រហម និងអឌ្ឍចន្ទក្រហម ៨ ឧសភា ២០២០ ក្រោមប្រធានបទ “ខ្ញុំស្រលាញ់សន្តិភាព និងកាកបាទក្រហមកម្ពុជា” ជាពិសេស តបតាមអនុសាសន៍ របស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ពុំចាំបាច់រៀបចំអង្គពិធីមេទ្ទីង ឬពិធីណាមួយដែលប្រមូលផ្ដុំមនុស្សឡើយ តែសុំធ្វើសេចក្ដីអំពាវនាវថ្នាក់ខេត្ត ស្វែងរកការចូលរួមគាំទ្រ និងបរិច្ចាកដោយស្ម័គ្រចិត្តពីសប្បុរសជន ។
យ៉ាងណាម៉ិញ មកដល់ពេលនេះ សាខាកាកបាទក្រហមកម្ពុជា ក៏កំពុងបានអនុវត្ត ទៅតាមអនុសាសន៍ខាងលើនេះ យ៉ាងយកចិត្តទុកដាក់ និងប្រកបដោយស្មារតីទទួលខុសត្រូវខ្ពស់ ផងដែរ ៕
