ឯកឧត្តម ហាន កុសល អភិបាលរង ខេត្តកំពង់ចាម និងជាប្រធានក្រុមការងារបច្ចេកទេសវិស័យផ្គត់ផ្គង់ទឹកស្អាត និងអនាម័យជនបទ ស្នើដល់រដ្ឋបាលស្រុក និងរដ្ឋបាលឃុំ សហការគ្នា ចុះប្រមូលទិន្នន័យខ្នងផ្ទះប្រជាពលរដ្ឋ ដែលមាន និងមិនទាន់មានបង្គន់ប្រើប្រាស់ ក្នុងមូលដ្ឋានរបស់ខ្លួន ដើម្បី អនុវត្តឲ្យសម្រេចតាមផែនការកំណត់ របស់រាជរដ្ឋាភិបាល នៅទូទាំងព្រះរាជាណាចក្រកម្ពុជា មានទឹកស្អាត និងបង្គន់ប្រើប្រាស់ ១០០ភាគរយ នៅត្រឹមឆ្នាំ២០២៥ ។ ថ្លែងយ៉ាងដូច្នេះ នៅក្នុងឱកាសឯកឧត្ដម អញ្ជើញជាអធិបតី ក្នុងកិច្ចប្រជុំ ស្តីពីការចុះបណ្តុះបណ្តាល ស្រង់ទិន្នន័យអនាម័យ និងទឹកស្អាត សម្រាប់បំពេញក្នុងតារាងប្រព័ន្ធ MIS នៅក្នុងស្រុកព្រៃឈរ ដែលរៀបចំដោយមន្ទីរ អភិវឌ្ឍន៍ និងជនបទខេត្ត នៅសាលប្រជុំសាលាស្រុកព្រៃឈរ នាព្រឹកថ្ងៃទី១៦ ខែកញ្ញា ឆ្នាំ២០២២ នេះ ។ កិច្ចប្រជុំនេះ មានការអញ្ជើញចូលរួម ពីលោក លោកស្រី តំណាងឲ្យមន្ទីរ អង្គភាព ស្ថាប័នពាក់ព័ន្ធ លោកអភិបាលរងស្រុកព្រៃឈរ និងអ្នកពាក់ព័ន្ធក្នុងមូលដ្ឋាន សរុបប្រមាណ ៨០នាក់ ផងដែរ ។
ឯកឧត្តម ហាន កុសល អភិបាលរងខេត្ត គូសបញ្ជាក់ថា វិស័យអនាម័យ និងទឹកស្អាត គឺជាតួនាទីនិងភារកិច្ចទទួលខុសត្រូវ របស់យើងទាំងអស់គ្នា ។ យ៉ាងណាមិញ មកដល់ពេលនេះ ការងារទឹកស្អាត នៅក្នុងខេត្តកំពង់ចាម គឺបានអនុវត្តស្ទើតែមួយរយភាគ គ្រប់ទីកន្លែងអស់ហើយ ពោលគឺ នៅឡើយតែការស្រង់ទិន្នន័យ សម្រាប់បញ្ចូលទៅក្នុងរបាយការណ៍ ឲ្យបានគ្រប់ជ្រុងជ្រោយ ។ ឯកឧត្ដម បានរំលឹកថា រាជរដ្ឋាភិបាលកម្ពុជា បានកំណត់ថា នៅគ្រប់ខ្នងផ្ទះប្រជាពលរដ្ឋ នៅទូទាំងព្រះរាជាណាចក្រកម្ពុជា មានទឹកស្អាត និងបង្គន់ប្រើប្រាស់ ១០០ភាគរយ នៅត្រឹមឆ្នាំ២០២៥ ខណៈដែល នាឆ្នាំ២០២៣ ប្រជាពលរដ្ឋកម្ពុជា មានបង្គន់ប្រើប្រាស់ ៩០% នោះ ។ ដូច្នេះ ស្នើទៅដល់រដ្ឋបាលស្រុក និងរដ្ឋបាលឃុំទាំងអស់ ត្រូវចូលរួមសហការគ្នា ធ្វើយ៉ាងណាប្រមូលទិន្នន័យទាំងអស់នោះ ឲ្យអស់លទ្ធភាព ដើម្បី ឲ្យដឹងថា នៅមានខ្នងផ្ទះ ក្នុងភូមិ ណាមួយ មានបង្គន់ប្រើប្រាស់? និងនៅសេសសល់ប៉ុន្មានភាគរយ មិនទាន់មាន? ហើយអ្នកមិនទាន់មាន តើមូលហេតុអ្វី? ។ ប្រការទាំងអស់នេះហើយ ដែលទាមទារឲ្យយើង ត្រូវរួមគ្នាដោះស្រាយ ជម្រុញ ណែនាំ និងលើកទឹកចិត្ត ដល់ពួកគាត់ដែលមិនទាន់មាន ឲ្យសាងសង់បង្គន់ប្រើប្រាស់ នៅក្នុងខ្នងផ្ទះរបស់ខ្លួន ដើម្បី ឈានទៅសម្រេចតាមការកំណត់ របស់រាជរដ្ឋាភិបាល ។ ដោយឡែក ក្រៅពីកិច្ចការនេះ ឯកឧត្ដម អភិបាលរងខេត្ត ក៏បានស្នើទៅដល់រដ្ឋបាលឃុំនីមួយៗ កែច្នៃ និងរៀបចំឲ្យមានជាសួនសាធារណៈ សម្រាប់ប្រជាពលរដ្ឋទៅកំសាន្ត ជាពិសេស មនុស្សវ័យចាស់ នៅក្នុងសហគមន៍កំសាន្ត ផងដែរ ។បើតាម លោក អ៊ឹង វិសុទ្ធ ប្រធានមន្ទីរអភិវឌ្ឍន៍ និងជនបទ ខេត្តកំពង់ចាម បានគូសបញ្ជាក់ថា មកដល់បច្ចុប្បន្ននេះ នៅក្នុងទូទាំងខេត្តកំពង់ចាម ការអនុវត្តវិស័យទឹកស្អាត សម្រេចបានប្រមាជា ៩៦% និងអនាម័យជនបទ បានចំនួន ៨២,៤៤% ក្នុងនោះ នៅក្នុងស្រុកព្រៃឈរ អនុវត្តបានចំនួន ៨៨% ហើយ ។
សូមបញ្ជាក់ថា កិច្ចប្រជុំនេះ ធ្វើឡើងដើម្បី ប្រមូលទិន្នន័យចំនួនក្នុងផ្ទះ ដែលមិនទាន់បានសាងសង់បង្គន់ប្រើប្រាស់ និងស្វែងរកដំណោះស្រាយសមស្រប ដើម្បី ជំរុញបន្ថែមឲ្យខ្នងផ្ទះ ដែលមិនទាន់បានសាងសង់បង្គន់ រួមគ្នាគិត និងរួមគ្នាធ្វើ ដើម្បី ឈានទៅសម្រេចផែនការយុទ្ធសាស្ត្រ របស់រាជរដ្ឋាភិបាល នាឆ្នាំ២០២៥ ប្រជាពលរដ្ឋនៅកម្ពុជា មានបង្គន់ប្រើប្រាស់គ្រប់ខ្នងផ្ទះ ។ ជាមួយនោះ ពីធីខាងលើនេះ ក៏បានធ្វើការប្រកាសភូមិ ODF ចំនួន ២ភូមិ គឺ ៖ ភូមិមេម៉ាំង និងភូមិសង្កែ នៃស្រុកព្រៃឈរ ផងដែរ ៕ សារ៉ាត
