កាលពីព្រឹកថ្ងៃទី២៥ ខែសីហា ឆ្នាំ២០២២ លោកជំទាវ អនហេង លក្ខិណា ប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារ ខេត្តកំពង់ចាម បានដឹកនាំក្រុមការងារចុះជួបសំណេះសំណាលសួរសុខទុក្ខ និងពង្រឹងការអនុវត្តតួនាទីភារកិច្ច របស់ គ.ក.ន.ក នៅឃុំកោះសូទិន ស្រុកកោះសូទិន ។បើតាម លោកជំទាវ អនហេង លក្ខិណា ឲ្យដឹងថា ក្នុងបេសកកម្មនោះ ក្រុមការងារបានពិភាក្សាការងារមួយចំនួន ជាមួយ គ.ក.ស.ក ស្រុក ក្រុមប្រឹក្សាឃុំ ដើម្បី ស្វែងយល់អំពីបញ្ហាប្រឈមនានា និងរកដំណោះស្រាយ ទៅតាមតម្រូវការ ជូនប្រជាពលរដ្ឋនៅក្នុងឃុំ ព្រមទាំង បានណែនាំបន្ថែមអំពីវិធានការចាំបាច់មួយចំនួន ដែលជាបទពិសោធន៍ ដើម្បី យកទៅផ្សព្វផ្សាយដល់ភូមិ ឃុំ នៃមូលដ្ឋាននីមួយៗខ្លួន ផងដែរ ។ ជាមួយគ្នានោះដែរ លោកជំទាវ បានផ្ដល់នូវការលើកទឹកចិត្ត និងជម្រុញការងារចូលរួមទប់ស្កាត់ សហការ ជាមួយអាជ្ញាធរ ពីសំណាក់ក្រុមការងារយុវជន ស.ស.យ.ក ភូមិ ឃុំ ប្រជាពលរដ្ឋ និងគ្រប់អ្នកពាក់ព័ន្ធ ឲ្យបានស៊ីជម្រៅជាងមុនបន្ថែមទៀត ។
ឆ្លៀតក្នុងឱកាសនោះដែរ លោកជំទាវ និងក្រុមការងារ ក៏បាននាំយកសម្ភារៈ និងថវិកាមួយចំនួន របស់ គ.ក.ស.ក ខេត្តកំពង់ចាម ផ្ដល់ជូនដល់គ្រួសារចាស់ជរាគ្មានទីពឹង និងជនមានពិការភាព ចំនួន ០៥គ្រួសារ ដោយក្នុង ១គ្រួសារៗ ទទួលបាន ៖ អង្ករ ២០គីឡូក្រាម មីជាតិ ១កេស ត្រីខ ១យួរ ទឹកស៊ីអ៊ីវ ១យួរ ទឹកត្រី ១យួរ និងថវិកាចំនួន ១០០.០០០រៀល ។ ដោយឡែក ស្ត្រីមេម៉ាយចំនួន ០២គ្រួសារ ទៀត ដែលកំពុងតស៊ូក្នុងការប្រកបរបរចិញ្ចឹមជីវិត លោកជំទាវ ក៏បានលើកទឹកចិត្ត ផ្តល់ជូនជាសម្ភារៈ និងដើមទុនបន្ថែម ដើម្បី ពង្រឹងលើមុខរបររបស់ពួកគាត់ ក្នុងនោះរួមមាន ៖ ១.ឈ្មោះ ស៊ីន លាងហយ នៅភូមិទី៤ ឃុំកោះសូទិន មានធុងទឹកកកធំ ១គ្រឿង សម្ភារៈក្លាសេភេសជ្ជៈ បន្ថែមលើមុខរបរប្រចាំថ្ងៃ ។ និង២.ឈ្មោះ ឈន់ សុខគីម នៅភូមិទី៤ ដូចគ្នា មានចង្អើរដែកធំ ១ សម្រាប់អាំងត្រីលក់ ប្រេងឆា ៥លីត្រ និងថវិកា ១០០.០០០រៀល ។ ក្រៅពីនោះ លោកជំទាវ ក៏បានឧបត្ថម្ភ លោកយាយ រិន ម៉ៃ រស់នៅភូមិទី៣ ជាចាស់ជរាគ្មានទីពឹងអាយុ ៨៧ឆ្នាំនូវថវិកា ៤០.០០០រៀល ផងដែរ ៕