ដោយ៖ ជួន រតនាវង្ស
នៅព្រឹក ថ្ងៃទី២៩ ខែមករា ឆ្នាំ២០២០ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានដឹកនាំក្រុមការងារបច្ចេកទេស និងអាជ្ញាធរមូលដ្ឋាន អញ្ជើញចុះពិនិត្យ និងសិក្សាផ្លូវគមនាគមន៍ជនបទចំនួន៣ ខ្សែ មានប្រវែងជិត២០ គីឡូម៉ែត្រ ស្ថិតនៅក្នុងស្រុកព្រៃឈរ និងស្រុកចំការលើ។
ផ្លូវខ្សែទី១ មានប្រវែង១៣,៥០០ ម៉ែត្រ ចាប់ពីផ្សារគរ ស្ថិតនៅក្នុងភូមិគរ ឃុំគរ ភូមិអណ្ដូងស្ដៅ ភូមិត្រាំង ភូមិលិចវត្ត ភូមិអណ្ដូងតាពេជ្រ ភូមិថ្មពូនកណ្ដាល ភូមិទួលថ្ម ភូមិអូរតាថុក ស្ថិតនៅក្នុងឃុំថ្មពូន ភូមិថ្មីស្ថិតនៅក្នុងឃុំក្រូច ស្រុកព្រៃឈរ ។ ហើយផ្លូវមួយខ្សែនេះកំពុងស្ថិតនៅក្នុងការពិនិត្យ និងសិក្សានៅឡើយ។
បន្ទាប់មកឯកឧត្តម និងក្រុមការងារបានបន្តដំណើរអញ្ជើញចុះពិនិត្យផ្លូវក្រាលកៅស៊ូ DBST មួយខ្សែប្រវែង៣,៦០០ ម៉ែត្រ ទទឹង៧ ម៉ែត្រ ស្ថិតនៅភូមិថ្មី ឃុំក្រូច និងភូមិថ្មដា ឃុំបឹងណាយ ដែលកំពុងសាងសង់បានប្រហែល៨៥% ហើយ ដោយផ្លូវមួយខ្សែនេះនឹងកសាងរួចរាល់១០០% នៅក្នុងកំឡុងពាក់កណ្ដាលខែកុម្ភៈ ឆ្នាំ២០២០។
ខណៈពេលនៃដំណើរអញ្ជើញចុះពិនិត្យសិក្សាផ្លូវខាងលើឯកឧត្តមអភិបាលខេត្តកំពង់ចាម បានជំរុញឱ្យអ្នកទទួលការសាងសង់ មានការយកចិត្តទុកដាក់ខ្ពស់ សំដៅធ្វើយ៉ាងណាឲ្យការសាងសង់ត្រឹមត្រូវទៅតាមលក្ខណៈបច្ចេកទេស និងដើម្បីឲ្យផ្លូវខាងលើធានាបាននូវការប្រើប្រាស់គង់វង្សយូរអង្វែង។
ក្រោយបញ្ចប់ការពិនិត្យ សិក្សាផ្លូវ២ខ្សែខាងលើ ឯកឧត្តមអភិបាលខេត្ត និងក្រុមការងារក៏បានបន្តដំណើរអញ្ជើញពិនិត្យ និងសិក្សាផ្លូវមួយខ្សែទៀតដែលមានប្រវែងជាង៦ គីឡូម៉ែត្រ តភ្ជាប់ពីឃុំក្រូច ស្រុកព្រៃឈរ ដល់ឃុំបុសខ្នុរស្រុកចំការលើ ដោយឆ្លងកាត់ភូមិចំនួន៤ គឺមានភូមិប្រសើរ ភូមិក្រវ៉ាន់ ភូមិសារ៉ាយនិងភូមិបុសខ្នុរ ស្ថិតនៅក្នុងឃុំបុសខ្នុរស្រុកចំការលើខេត្តកំពង់ចាម។